Wazee Wamzawadia Lowassa Ng’ombe Kumuunga Mkono Katika Harakati Zake za Kugombea Urais

Baraza la wazee Wilaya ya Nyamagana na Ilemela jijini Mwanza, limempatia Waziri Mkuu wa zamani, Edward Lowassa ng’ombe wawili ikiwa ni sehemu ya kumuunga mkono katika harakati zake za kugombea urais kupitia Chama Cha Mapinduzi(CCM), muda ukifika.

 

Akizungumza wakati wa hafla fupi iliyofanyika mwishoni mwa wiki iliyopita jijini hapa, wakati wa kupokea mrejesho wa Umoja wa Shirika la Machinga Mwanza(SHIUMA), waliokwenda wilayani Monduli, mkoani Arusha kumshawishi Lowassa kuchukua fomu, Mjumbe wa baraza hilo, Yakokumya Chota alisema wameamua kutoa ng’ombe hao kama ishara ya kumuenzi Lowassa.

 

Alisema baraza la wazee ndani ya wilaya hizo, limeamua kumpatia ng’ombe hao wa kienyeji kwa ajili ya kuwatumia kama kitoweo kwa ajili ya wageni wanaofika nyumbani kwake kuzungumza naye na kumtia moyo kuhusu kuwania urais kupitia CCM.

 

“Tulitamani tuandamane sote kwenda Monduli, lakini wengine umri wetu ni mkubwa hatuwezi tena kusafiri umbali mrefu, lakini tumefarijika sana na uwakilishi wetu kwa Lowassa, sisi wazee tunamuunga mkono kwa asilimia mia moja.

 

“Pamoja na vikwazo anavyokumbana navyo tuna uhakika atafanikiwa kupenya, tunaamini katika utendaji kazi wake wa kusimamia maamuzi kwa niaba ya wnaanchi, ndio maana tumeamua kumuunga mkono kwa nguvu zote,” alisema.

 

Hata hivyo, wazee hao waliwaomba vijana kuandaa utaratibu wanaona unafaa kwa ajili ya kuwapeleka ng’ombe hao nyumbani kwa Lowassa.

 

Naye mlezi wa SHIUMA, Alfred Wambura alisema wamekuwa wakisikitishwa na namna siasa ndani ya CCM zilivyogeuzwa kuwa za chuki, na kuwataka viongozi wa ngazi za juu kuacha kuwachagulia wananchi viongozi.

 

“Siasa ndani ya CCM zimekuwa za kukomoana, viongozi wa ngazi za juu wamekuwa wakiwachagulia wananchi viongozi hali ambayo imekuwa ikisababisha chama kushindwa katika chaguzi mbalimbali, wanapaswa kufuata upepo unavyokwenda na sio vinginevyo, Lowassa kwa sasa ndio kiongozi anayekubalika,” alisema.