Coutinho, Jaja ndiyo hivyo

Jaja 

Tofauti na wenzake wengi, Coutinho ana mwili wa wastani, lakini amekuwa ngangari muda wote wa mazoezi huku akigongana na huyu mara yule ili mradi mambo hayaharibiki.

MBRAZILI wa Yanga, Andrey Coutinho anapambana na wachezaji wenzake katika jua kali na kusisitiza yeye si mlaini kama mashabiki wanavyomtafsiri kwa kuangalia umbo na rangi yake, huku benchi la ufundi likibaini staili ambayo itampa Genilson Santos ‘Jaja’ unafuu mikoani.

Tofauti na wenzake wengi, Coutinho ana mwili wa wastani, lakini amekuwa ngangari muda wote wa mazoezi huku akigongana na huyu mara yule ili mradi mambo hayaharibiki.

Coutinho ameliambia Mwanaspoti: “Unajua huu ni mpira, sasa lazima upambane ili ufanikiwe. Mimi siyo laini kabisa ndiyo maana unaniona napambana muda wote.”

Muda mwingi wa mazoezi hayo, Coutinho amekuwa akionekana kuutamani mpira na hata anapopokonywa amekuwa akiutafuta kwa nguvu akiwakaba wapinzani wake na kufanikiwa kuuchukua.

Anaonekana kutojali hali ya hewa ya joto na muda wote amekuwa hashindwi zoezi lolote linalotolewa na Kocha Marcio Maximo ‘The Chosen One’.

Kuna wakati baadhi ya wachezaji huchemsha zoezi la kukimbia kasi au taratibu lakini Coutinho amekuwa akifanya vizuri.

Coutinho ni mmoja wa Wabrazili wawili waliosajiliwa na Yanga akiwemo Jaja na anaonekana ana nafasi kikosi cha kwanza.

Neiva ampa mbinu Jaja

Kocha Msaidizi wa Yanga, Leonardo Neiva amesema kuwa watakuwa wanatumia staili ya kupiga mipira na pasi ndefu za juu kwa ajili ya viwanja vibovu na vile vigumu kucheza vinavyoelezwa kuwa ni taabu kwa wachezaji wa Yanga wanaposafiri mikoani.

“Ili kuepukana na tatizo hilo, tutacheza mifumo yote ambayo tumekuwa tukiitumia, lakini huko hatutacheza mipira ya chini, tutakuwa tunacheza mipira mingi ya juu na krosi kwa wingi na hiko ndicho tunachowafundisha wachezaji kwa sasa,” alisema.

Naye Coutinho alisema: “kiukweli naogopa viwanja vibovu, lakini kwa pamoja kama timu naamini tutaweza kupata mafanikio. Mimi binafsi najua kuwa Jaja atafaidi kwa sababu anapiga mipira ya vichwa na uwezo wake ni mkubwa kwenye kucheza mipira ya juu.

“Unajua ni ngumu kucheza mpira kwenye viwanja vibovu haswa kucheza pasi za chini. Mara nyingi huweza kupoteza malengo ya uchezaji hivyo ujanja ambao utaifaidisha timu ni kucheza mipira ya juu kwa juu.”