MKOSAMALI ATIBUA BUNGE

MBUNGE wa Mhambwe, Felix Mkosamali (NCCR-Mageuzi), amezua mjadala mkali bungeni kwa kuishambulia Serikali ya CCM akidai kuwa mawaziri wake wamekuwa wakitoa majibu mepesi yasiyo na mashiko.

Mkosamali alitoa kauli hiyo jana wakati akiuliza swali la kuitaka serikali ieleze ni lini itapeleka muswada bungeni kwa ajili ya kutunga sheria ambayo itatoa nafasi ya kila mbunge kulindwa kisheria kama ilivyo kwa viongozi wengine.

Katika swali hilo, Mkosamali alisema kuwa kutokana na wabunge kufanya kazi ngumu ya kuwafichua mafisadi, wanafanya kazi katika mazingira magumu, hivyo wanatakiwa kupatiwa ulinzi kisheria.

Hata hivyo, Mkosamali alicharuka zaidi pale Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi, alipojibu swali lake, lakini akadai majibu hayo hayana mashiko.

“Wakuu wa wilaya na mikoa si watu wadogo wadogo kama Mkosamali anavyosema, ni viongozi wanaosimamia na kutekekeza shughuli za jamhuri kwa mujibu wa sheria na yale wanayoyafuata wakuu wa wilaya na mikoa yapo katika masharti yao ya kazi.

“Hawa wanaopata ulinzi, yako kwenye masharti yao ya kazi, Bunge ni mhimili unaojitegemea, hata mara moja serikali hatuwezi kuamua mambo yanayowafaa wabunge, kwahiyo hili jambo mimi kama kamishna na makamishina tuliopo hapa tumelisikia kwa sababu ni jukumu la mhimili kushauriana na serikali juu ya masharti ya kazi na mambo mbalimbali,” alisema.

Kutokana na majibu hayo, Mkosamali aliendelea kuwashambulia viongozi hao akidai wanafanya kazi zao kwa kujipendelea wenyewe.

“Inashangaza kuona mawaziri wa Serikali ya CCM wanavyojibu majibu mepesi mepesi ambayo hayana mashiko, ikumbukwe kuwa wabunge wanafanya kazi kubwa ya kufichua uhalifu ikiwa ni pamoja na kuwasema mafisadi.

“Hapa mimi nimetaka kuelezwa ni lini serikali italeta muswada wa kurekebisha sheria kwa ajili ya kumpatia mbunge ulinzi, lakini cha kushangaza mawaziri wanasema kuwa watakaa ili wazungumze waone kama hali hiyo inawezekana,” alisema.

Awali katika swali la msingi, Mbunge wa Kasulu Mjini, Moses Machali (NCCR-Mageuzi), alitaka kujua kutokana na kuwepo kwa vitendo vya kuvamiwa viongozi mbalimbali, wakiwemo wabunge wakiwa mitaani na hata majumbani mwao na watu wasiojulikana, serikali kwa sasa haioni umuhimu wa kuwapatia wabunge na viongozi wengine askari wa kuwalinda dhidi ya watu wabaya.

Akijibu swali hilo, Naibu Waziri wa Maji, Amos Makala, kwa niaba ya Waziri wa Mambo ya Nadani ya Nchi, alisema katika kutoa ulinzi wa viongozi, Jeshi la Polisi linazingatia sheria ya Jeshi la Polisi sura Na. 322 ya mwaka 2002 pamoja na PGO Na. 291 na 316.

Alisema kuwa viongozi wanaostahili ulinzi wa jeshi hilo ni Rais wa Jamhuri, Makamu wake, Rais wa Zanzibar, Waziri Mkuu, Makamu wa Kwanza na wa Pili wa Rais wa Zanzibar, mawaziri wakuu wastaafu pamoja na viongozi mbalimbali kulingana na umuhimu wao.