BENKI YA EXIM KUPIGA JEKI HUDUMA ZA AFYA YA UZAZI NA MTOTO

 Baadhi ya kina mama nje ya hospitali ya Bombo mkoani Tanga wakiwa na miamvuli waliyosaidiwa na Benki ya Exim Tanzania ikiwa ni sehemu ya mpango wa Benki hiyo wa kugawa miamvuli bure kwa kina mama wazazi katika kuunga mkono jitihada za serikali kuboresha afya nchini. Benki ya Exim imejikita katika mpango huo ili kuwasaidia kina mama kujikinga na adha ya jua kali na mvua pale wanapohudhuria kliniki na watoto wao. 

Afisa Masoko wa Benki ya Exim Fatma Kilinda (mwenye fulana nyeupe) akigawa miamvuli kwa kina mama nje ya hospitali ya Bombo mkoani Tanga iliyotolewa na Benki hiyo ikiwa ni sehemu ya mpango wa Benki hiyo wa kugawa miamvuli bure kwa kina mama wazazi katika kuunga mkono jitihada za serikali kuboresha afya nchini. Benki ya Exim imejikita katika mpango huo ili kuwasaidia kina mama kujikinga na adha ya jua kali na mvua pale wanapohudhuria kliniki na watoto wao.

============   =======  ==========

Benki ya Exim kupiga jeki huduma za afya ya uzazi na mtoto

Na Mwandishi Wetu, Tanga

KATIKA jitihada za kusaidia mpango wa serikali wa kuboresha afya ya uzazi na mtoto nchini Tanzania, Benki ya Exim Tanzania imebainisha kuendelea kutoa misaada katika sekta hiyo kwenye maeneo ambayo yanaonekana kutoingia kwenye mpango wa uboreshaji wa sekta hiyo ya afya ya uzazi na mtoto.

Benki hiyo ikiwa inaamini katika kauli mbiu yake kuwa "Ugunduzi ni maisha",  imejikita katika mpango wa kusambaza miavuli bure kwa akina mama wanaohudhuria kliniki katika hospitali mbalimbali ya nchini.

Akizungumza muda mfupi baada ya kutoa miavuli kadhaa kwa kina mama mbali mbali nje ya hospitali ya Bombo katika mkoani Tanga, Meneja wa Benki ya Exim Tawi la Tanga, Bw. Deogratius Makwaia alisema kuwa benki ya Exim imeamua kuelekeza sehemu ya fedha zake zilizotengwa kwa ajili ya shughuli za kijamii kununua miavuli kwa kina mama na watoto wao ambao baadhi yao hawana uwezo wa kununua miamvuli hiyo.

"Ni kweli kwamba Serikali, mashirika ya maendeleo na wadau wengine wanapiga jeki sekta ya afya ya uzazi na mtoto ikiwa ni eneo lenye kipaumbele katika sekta ya afya. Hata hivyo, wakati wa kupanga, tuligundua kwamba fedha nyingi uelekezwa kwenye ujenzi wa vituo vya afya, kununua vifaa na dawa, lakini kusahau kusaidia vitu vingine muhimu  ambavyo mama na mtoto uvihitaji baada ya kuondoka katika kituo cha afya.

"Baada ya utafiti wetu katika hospitali kadhaa nchini kote, tuligundua kwamba akina mama wengi wanaohudhuria kliniki za wajawazito ukumbana na wakati mgumu pindi mvua zinaponyesha au wakikumbana na jua kali wakitokea sehemu mbali kuhudhuria kiliniki na watoto wao.

"Ukosefu wa makazi kwa akina mama hawa na watoto wao, inaweza kuwa ndiyo sababu inayochangia kwa baadhi yao hasa katika maeneo ya vijijini – kutohudhuria huduma za kiafya mara kwa mara ambayo utolewa bure.

"Mpango wa Benki ya Exim wa kutoa miamvuli kwa kina mama na watoto, umeanzishwa ili kusaidia wale kina mama ambao hawana uwezo wa kumudu gharama za miamvuli kujikinga dhidi ya mvua na jua kali ambalo linaweza kuwa na madhara kwa afya zao," alisema Makwaia.

Aidha, alisema kuwa Benki ya Exim itaendelea kuiunga mkono serikali katika utekelezaji wa miradi mingine ya maendeleo nchini.

"Utamaduni wa kurejesha sehemu ya pato letu kwa jamii umekuwa ni kipaumbele chetu kikubwa. Hilo linatokana na Benki ya Exim kuendelea kukua na kwa mwaka jana ilipata faida ya shilingi bilioni 20. Nina hakika kwamba uongozi wetu umekuwa ukifanya bidii za kutosha kurejesha pato hili kwa jamii kama njia ya kuboresha hali ya maisha ya wananchi pale ambapo Benki inafanya shughuli zake, kama vile kusaidia ukuaji wa kiuchumi," aliongeza Makwaia.