ANSGAR CUP-PERAMIHO: BAADA YA KUTIMUA BENCHI LA UFUNDI, AFYA FC YAICHABANGA KILAGANO’A’ GOLI 1-0

Na Oswald Ngonyani, Peramiho Publications

Kindumbwe ndumbwe cha ANSGAR CUP-PERAMIHO, kimeendelea tena jana jioni ambapo timu kutoka katika Kata za Kilagano na Peramiho zilikuwa zikioneshana kazi kwa lengo la kupata pointi tatu muhimu.

Katika mchezo wa kwanza uliopigwa mishale ya saa nane za mchana, timu ya AFYA FC imepata ushindi wa kwanza tangu kuanza kwa mashindano hayo baada ya kuifunga timu ya KILAGANO ‘A’ goli 1-0 goli lililofungwa na mshambuliaji Moses Mgomela kunako kipindi cha kwanza kufuatia mpira wa pigo huru (free kick).

Ushindi huo wa AFYA FC umekuja mara baada ya Uongozi wa juu wa timu hiyo kuwafukuza Makocha wa timu hiyo baada ya mwenendo mbovu wa mechi za awali huku wachezaji wa timu hiyo wakijiongoza wenyewe kwa sasa.

Katika dakika za awali za kipindi cha pili mchezo huo uliingiwa na sintofahamu baada ya mwamuzi wa mchezo huo kuruhusu kipindi cha pili kuanza pasipo golikipa wa AFYA FC Bwana John Mtuli kuingia uwanjani na hivyo kuibua zogo miongoni mwa mashabiki wengi waliokuwepo uwanjani hapo.

Kwa ushindi huo, timu ya AFYA imefikisha pointi nne baada ya kucheza mechi tatu huku ikiwa imebakiza mechi mbili dhidi ya LIKUYU ‘B’ na MPANDANGINDO, ambapo ili kujiweka katika mazingira ya kucheza nusu fainali, inatakiwa ishinde mechi zote zilizobaki.

Ama katika mchezo wa pili uliopigwa majira ya saa kumi za jioni, matumaini ya wakazi wa PERAMIHO’A’ kwa timu yao ya RED STARS yamezidi kuingiwa na shubiri baada ya timu yao hiyo kufungwa goli 1-0 na ZOMBA FC goli lililofungwa kunako dakika ya 75 ya kipindi cha pili kwa mkwaju wa penati baada ya mlinda mlango wa timu hiyo Daud Nyoni kumfanyia madhambi mchezaji wa ZOMBA FC.

Kwa matokeo hayo timu ya ZOMBA FC imefikisha pointi tisa baada ya kucheza michezo minne, huku RED STARS ikibaki na pointi mbili baada ya kucheza michezo mitatu na hivyo kutakiwa kufanya kazi ya ziada ili kuweza kucheza hatua ya nusu fainali.

Wakati huo huo Mashindano ya Njunde Cup yanataraji kuanza kutimua vumbi Jumatano ya wiki hii katika Uwanja wa Tamasha huku timu kumi tayari zimekwisha thibitisha kushiriki katika kindumbwendumbwe hicho.

Akizungumzia na Peramiho Publications, Katibu wa Ligi hiyo Bwana SIXBERT KOMBA ameweka bayana kuwa kila kitu kuhusu Ligi hiyo kipo katika utayari wake huku akiwataka wakazi wa Peramiho kujitokeza kwa wingi uwanjani hapo kwa lengo la kuwapa morali wachezaji wao.