BADALA YA UTATUZI, KISOKI NA SPUTANZA SASA WAMEGEUKA TATIZO

KISOKI AKIWA NA MESSI WAKIINGIA KATIKA OFISI ZA TFF...

SAKATA la Ramadhani Singano ‘Messi’ na mwajiri wake Simba ndiyo limeshika anga la michezo, lakini limekuwa suala linalochanganya sana.

Messi amekuwa akisema mkataba wake na Simba unaisha mwaka huu lakini Simba inasema ni wa mwaka mmoja zaidi hadi 2016. Hapo ndiyo utata ulipoanzia.

Mara kadhaa, utawasikia baadhi ya wadau wenye ugomvi na uongozi wa Simba, wakitoa maoni yao kwa kusukuma lawama kwa uongozi huo kuwa unafanya utapeli kwa kuongeza mkataba kinyemela.

Wako wenye mapenzi na Simba, wamekuwa wakimlaumu Messi kwamba anafanya vitu ambavyo vinaonyesha havina mapenzi kabisa na klabu hiyo na anastahili kuachwa.

Huenda ni kipindi cha kila mmoja kutoa hisia zake kwa upande wowote, lakini kama watu wangekubali ushauri wangu, huu si wakati mwafaka wa kumlaumu Messi au Simba kwa kuwa hakuna mwenye uhakika sana.

Chama cha Wanasoka Tanzania (Sputanza), ndiyo walikuwa watu sahihi wa kueleza tatizo hilo na mwisho kupata usuluhishi wake na Mwenyekiti wake, Mussa Kisoki ndiye amekuwa akishughulikia. Nilijua mwisho ungekuwa mzuri kwa kuwa Kisoki ni mtu wa watu wa hatu na mpenda haki.

Lakini baada ya kile kikao kilichoihusisha Simba, Messi, Sputanza na TFF nikaingiwa hofu kubwa na uwezo wa Sputanza kutetea maslahi ya wachezaji na huenda badala ya kutetea au kusaidia basi wanaweza kusababisha tatizo kubwa sana.

Maana baada ya kikao, nilimsikia Katibu Mkuu wa TFF, Mwesigwa Selestine akizungumza, hakika hakunyoosha mazungumzo. Baadaye akazungumza Kisoki ambaye alijichanganya zaidi na kunishangaza. Zaidi alisema amefurahishwa na kilichofanyika siku hiyo na anaunga mkono Messi na Simba kukaa meza moja na kujadili mkataba.

Dakika chache baadaye alizungumza Messi ambaye alionekana wazi hakuelewa kilichofanyika katika mkutano huo baada ya kusema haelewi kwa makubaliano hayo ni mchezaji huru na kama watashindwa kufikia makubaliano na Simba anakuwa wapi, tayari kujiunga na timu nyingine au anabaki kuwa mchezaji wa Simba!

Kwa maelezo ya Mwesigwa na Kisoki, kweli ilikuwa inachanganya na utaona kuanzia siku hiyo mitandaoni na siku iliyofuata katika magazeti, watu waliripoti wanavyojua. Maana ilikuwa vigumu kuelewa, TFF na Sputanza wakajichanganya na Msemaji wa Simba, Haji Manara akaharibu zaidi kuzungumza kibabe bila sababu za msingi.

Wakati waandishi wanahoji, walionekana ni tatizo. Lakini sasa imethibitika kweli kulikuwa na tatizo na Kisoki amekuwa wa kwanza kusema wanataka suala hilo lisikilizwe tena, maana yake hawatambui kile kikao cha mwanzo ambacho kilikuwa na makubaliano aliyosema ameyafurahia.

Huu ni uthibitisho hata Kisoki alimaliza kikao akiwa haelewi lolote lakini alikuwa amefurahishwa. Baadaye alikaa na wenzake wakamueleza namna ambavyo alikosea.

Kikao kiliisha, Watanzania wapenda soka hawakuelezwa kwamba je, mkataba wa Messi unaoisha 2015 au ule wa Simba unaofikia tamati 2016, upi hasa ni sahihi?

Mimi nilibahatika kuona mikataba yote ilikuwa na matatizo. Herufi kadhaa zilionekana zimechezewa hata kwenye ule mkataba wa Messi. Hivyo nilipenda kujua mwisho itakuwaje. Inaonekana kila upande huenda umeona kuna makosa, ndiyo mwanzo wa mkanganyiko mwingine kwa kuwa kauli za Mwesigwa na Kisoki zilizonyesha wazi kuna jambo linafikichwa kutoka upande wa Messi, Simba au pande zote.

Sasa Sputanza wameanza mchakato upya, nani ana uhakika au anawaamini hata makubaliano mengine watasema jambo la uhakika kwa kuwa anayeshughulikia ni braza Kisoki yuleyule aliyesema amefurahishwa na siku moja iliyofuatia akayaruka maneno yake na kusema tofauti.

Sputanza ndiyo chombo kinachopaswa kuwa imara kutetea haki za wachezaji kuliko hata TFF. Sasa kinapaswa kuwa imara, chenye kauli thabiti na si katika kitu kimoja leo kinataganza kinaamini A, kesho kinasema kinaamini B!