Watu Wanne Mbaroni Kuchoma Masijala ya Idara ya Ardhi Kigoma

Watu wanne wanashikiliwa na Jeshi la Polisi Mkoani Kigoma, kwa tuhuma za kuchoma moto Masijala ya Idara ya Ardhi ya Manispaa ya Kigoma Ujiji na kuteketeza Hati na Nyaraka mbali mbali zilizokuwemo.

Kamanda wa Polisi Mkoani Kigoma, ACP Jafari Mohamed Ibrahim, amewataja watu hao kuwa ni Anna Fanuel (46), mhudumu wa ofisi, Makrina Paul (49),Karani, Saimon Pius (37),mkazi wa Burega na Tumaini Esau (44), mkazi wa Mwasenga, Manispaa ya Kigoma Ujiji.

Alisema kuwa mnamo Octoba mosi mwaka huu majira ya saa nne na robo usiku Masijala ya Idara ya Ardhi ya Manispaa ya Kigoma Ujiji ilichomwa moto na kuteketeza hati na nyaraka mbali mbali kitendo ambacho ni kinyume cha Sheria.

Inadaiwa kuwa kitendo hicho ni njama ya kupoteza vielelezo nyeti kutokana Idara hiyo kughubikwa na migogoro inayohusiana na ugawaji wa viwanja.

Kamanda Mohamed alisema watu hao walitumia mafuta ya Petroli kuchoma ofisi hiyo na kwamba uchunguzi wa kina juu ya tukio hilo unaendelea.