HUU NDIO UGUMU WA KIPUTE CHA YANGA vs KMKM LEO….

MABINGWA wa kandanda Tanzania bara, Young Africans leo wanahitaji ushindi mzuri dhidi ya KMKM ya Zanzibar ili kujihakikishia kucheza hatua ya Robo Fainali ya Kombe la Kagame linaloendelea kutimua vumbi jijini Dar es salaam.

Wakati huo huo, KMKM nao wanahitaji ushindi ili kujihakikishia kwenda Robo Fainali.

 KMKM na Yanga SC zote zina pointi tatu baada ya kila timu kushinda mechi moja hadi sasa, dhidi ya wapinzani mmoja, Telecom ya Djbout.

KMKM walishapoteza mechi mbili baada ya kufungwa 2-1 na Khartoum N na 3-1 dhidi ya  Gor Mahia, wakati Yanga SC imepoteza mechi moja tu dhidi ya mabingwa mara tano wa michuano hiyo  Gor Mahia.

                            

Kikosi cha timu ya KMKM ya Zanzibar kinachopambana na Khartoum National Club ya Sudan

Endapo KMKM itafungwa  leo, watatupa nje ya michuano hiyo.

Yanga SC ikicheza leo itabakiwa na kibarua kigumu dhidi ya vinara wa kundi  A, Khartoum National Club  ya Sudan ambayo itakuwa ya mwisho baada ya kucheza na KMKM .

Khartoum ina pointi sita, mabao saba ya kufunga na moja la kufungwa, wakati Gor Mahia walio nafasi ya pili wana ponti sita, mabao matano ya kufunga na mawili ya kufungwa.
Yanga SC inashika nafasi ya tatu kwa pointi zake tatu, mabao manne ya kufunga na mawili ya kufungwa, wakati KMKM ina pointi tatu, mabao matatu ya kufunga na matano ya kufungwa.
Telecom ya Djibouti ambayo itacheza mechi ya mwisho na Gor Mahia kabla ya kurejea kwao imepoteza mechi zote tatu.
Ilifungwa 1-0 na KMKM, ikafungwa 5-0 na Khartoum na jana imefungwa 3-0 na Yanga SC. 

Timu tatu kati ya tano za kundi hilo zitakwenda Robo Fainali kuungana na washindi wawili wa kila kundi B na C pamoja na mshindi wa tatu bora kutoka makundi hayo.