|
 Rais
Jakaya Kikwete akizungumza na Rais wa Malawi, Joyce Banda mjini Maputo
nchini Msumbiji jana, Marais hao walizungumzia namna ya kutafuta suluhu
katika mgogoro wa mpaka kati nchi hizo katika ziwa Nyasa kwa njia za
kidiplomasia kupititia kamati maalumu iliyoundwa kushughulikia mgogoro
huo. (Picha na Ikulu)
Tausi Mbowe
RAIS Jakaya Kikwete
amesema kuwa, Tanzania haina mpango wala nia ya kuingia katika vita na
nchi jirani ya Malawi kufuatia tofauti zao kuhusu mpaka katika Ziwa
Nyasa.Rais Kikwete alisema hayo jana alipokutana na Rais wa Malawi,
Joyce Banda mjini Maputo Msumbiji. "Namhakikishia dada yangu
(Joyce Banda) na watu wote Malawi kwamba, hatuna nia wala mpango wa
kuingia vitani. Hatuna matayarisho ya jeshi wala jeshi alijasogea popote
kwa vile hakuna sababu ya kufanya hivyo,” alisema Kikwete na
kusisitiza:
"Mimi ndiye amiri Mkuu wa Majeshi ya Tanzania na sijapanga wala kutoa maelekezo ya vita."Kauli
hiyo inapingana na iliyowahi kutolewa hivi karibuni na Edward Lowassa
ambaye ni Mwenyekiti wa Kamati ya Kudumu ya Bunge ya Mambo ya Nje,
Ulinzi na Usalama, aliyesema kuwa Tanzania iko tayari kwa vita iwapo
Malawi itaendelea kushikilia msimamo wake kuwa eneo hilo ni la Malawi.
Katika
mkutano wake na waandishi wa habari mjini Dodoma hivi karibuni, Lowassa
alisema kuwa Tanzania imejiandaa kiakili na kivifaa kuingia vitani na
Malawi kama italazimika kufanya hivyo na kwamba kamati yake imeridhishwa
na maandalizi ya Jeshi la Ulinzi la Wananchi wa Tanzania (JWTZ).
Rais
Kikwete, alisema kwa muda mrefu kumekuwa na utata kuhusu suala la mpaka
na tayari maofisa wa pande zote mbili wameanza kulizungumzia kwa nia ya
kulitatua kwa amani.
Rais Kikwete aliwalaumu wanasiasa kwa
kulikuza suala hilo na kuwataka waandishi wa habari kujiepusha na maneno
yanayoleta taharuki na chokochoko baina ya nchi hizo mbili.
"Tuviachie
vyombo vyetu vya umma vifanye kazi. Hebu tuvipe nafasi na wanasiasa na
waandishi wa habari wajiepushe na maneno haya yanayosababisha taharuki
na chokochoko, kwani hayana maana yoyote katika kujenga uhusiano wetu,”
Kikwete alisisitiza na kuongeza:
“Naomba wanasiasa na waandishi wa habari waiache diplomasia ifanye kazi yake."
Rais Kikwete yuko mjini Maputo, Msumbiji kuhudhuria mkutano wa viongozi wa
Jumuiya ya Maendeleo Kusini mwa Afrika (SADC), uliofunguliwa juzi na ulitarajiwa kumalizika jana jioni.
Kutokana na kauli hiyo, Rais Banda alisema kuwa, amefurahishwa na kufarijika kwa Rais Kikwete kumhakikishia kuwa hakuna vita.
"Nimefarijika
sana, suala hili limetusumbua sana," alisema Rais Banda na kuvishukuru
vyombo vya habari vya Malawi kwa kuonyesha uzalendo na ukomavu katika
suala hilo.
Kauli ya Lowassa
Katika mkutano
wake na wanahabari mjini Dodoma, Lowassa alisema kuwa kamati yake
imepewa maelezo na jeshi kwamba wameridhika na kuwa ikibidi kuingia
vitani jeshi liko vizuri na limejipanga vizuri kwa uhakika, kiakili na
kivifaa.
Kabla ya kuzungumza na waandishi wa habari, Lowassa
alifanya kikao cha dharura cha faragha kilichohusisha wajumbe wa kamati
hiyo na makamanda wa JWTZ waliofika bungeni kutoa taarifa kwa kamati
hiyo.
Hata hivyo, katika tamko hilo Lowassa alisema Tanzania
inatarajia mgogoro huo utamalizika kwa njia za kidiplomasia kwa sababu
Watanzania na Wamalawi ni ndugu wa muda mrefu.
Mwenyekiti huyo
ambaye aliwahi kuwa Waziri Mkuu kabla ya kujiuzulu, alisema kuwa kama
Tanzania itafikishwa mahali itabidi damu ya Watanzania imwagike, nchi
iko tayari kulinda mipaka yake kwa nguvu.
Alisema kama itabidi
kuingia vitani, itatumia umoja na mshikamano wa Watanzania wa mwaka 1978
wakati wa Vita na Uganda kulinda mipaka ili kulinda heshima ya nchi.
Lowassa
alisema kuwa kamati yake inajua madhara ya kiuchumi yaliyotokana na
Vita ya Idd Amin na kwamba vita yoyote ikipiganwa, lazima kunakuwa na
madhara ya kiuchumi.
Hata hivyo, alisema anaamini mgogoro huo
hautafika huko na kusisitiza kuwa, lakini ikibidi JWTZ ni moja kati ya
majeshi bora duniani na ni jeshi lililojiandaa vizuri kwa lolote.
Kauli
ya Lowassa ilikuja siku chache baada ya Waziri wa Mambo ya Nje na
Ushirikiano wa Kimataifa, Bernard Membe kutoa msimamo bungeni kuhusu
mgogoro huo na kwamba ndiyo kauli rasmi ya Serikali.
Kauli ya Membe
Katika
msimamo huo, Waziri Membe alizionya kampuni za kigeni za Malawi
zilizoingia katika ardhi ya Tanzania eneo la Ziwa Nyasa kutafiti mafuta
na gesi akizitaka kusitisha mara moja.
Akiwasilisha makadirio ya
wizara yake, Membe alisema upo ushahidi kuwa ndege tano za utafiti za
Malawi ziliruka anga la Tanzania na kutua katika Ziwa Nyasa upande wa
Tanzania.
Membe alisema pamoja JWTZ kutoruhusu ndege hizo za
Malawi kuingia na kutua eneo hilo la Ziwa Nyasa, bado ziliingia na kutua
kinyume kabisa cha sheria za kimataifa.
Chimbuko la mgogoro
Mapema
mwezi Julai, Waziri wa Mambo ya Nje wa Malawi, Patrick Kabambe
alikaririwa na Redio Sauti ya Ujerumani akisema wataendelea na utafutaji
mafuta licha ya onyo hilo la Tanzania. Waziri huyo alisema ziwa
hilo linaitwa Malawi na siyo Ziwa Nyasa na kwamba utafutaji wa mafuta na
gesi utaendelea na hakuna wa kuwasimamisha. Alihoji, iweje Tanzania
ishtuke sasa? |
