WALISHWA PAKA, MBWA NA MZOGA WA PUNDA PASIPO KUJUA

Baadhi ya wanakijiji wa ILandutwa wakilalamikia kitendo hicho cha kulishwa nyama ya punda,mbwa na paka, Kulia ni Victor Meena

Hapa mwandishi wa Kwanza Jamii Mathias Canal akikwea kwenye gari kuelekea kijiji cha Ilandutwe.

Huyu ndiye mama aliyeibiwa mbwa wake akachinjwa na kuuzwa Anjelina Kanyika.

Kushoto ni Victor Meena wa Nuru fm, anayefuata ni Mwenyekiti wa kijiji cha Ilandutwa Isack Nganingo, Anayefuata ni Anjelina Kanyika mkazi wa kijiji cha Ilandutwa, Kulia ni Mathias Canal wa Kwanza Jamii.

Katikati ni Mwandishi wa Kwanza Jamii Mathias Canal, akiwa moja ya vijiwe katika kitongoji cha Lugofu na wananchi waliokerwa na kitendo cha kulishwa mbwa bila kujua.

Na Mathias Canal-Kwanza Jamii, Iringa vijijini

Wakazi wa Kitongoji cha Lugofu kijiji cha Ilandutwa Wilaya ya Iringa vijijini, Mkoani Iringa wamelaani kitendo cha baadhi ya wafanya biashara wa nyama kijijini hapo kwa kuwalisha nyama ya paka, mbwa na punda pasipo kujua.

Wakizungumza na Kwanza Jamii kijijini hapo, wanakijiji hao walisema kuwa mara ya kwanza walipopata taarifa ya kulishwa nyama ya paka hawakutoa taarifa kwa mtu yeyote kutokana na kuamini kwamba wafanyabiashara hao watajirekebisha kwa kuacha uuzaji wa nyama hizo haramu na badala yake kuanza kuuza nyama ambazo ni halali.

Visent Mtale mkazi wa kitongoji cha Lugolole ”A” amesema kuwa Balozi wa Kitongoji cha Lugofu Bw Ngojea Ng’alla hivi karibuni aliiba mbwa wa Bi Anjelina Kanyika na kumpeleka kwa kijana anayefahamika kwa jina la Manati Dunda.

Nung’uniko alimfukua punda aliyekufa akazikwa, hivyo yeye akamchija hatimaye akatengeneza supu ya mchanganyiko wa nyama ya punda,nyama ya nguruwe na viazi mviringo hatimaye kuiuza kwenye kijiji hicho ambacho nyama hiyo ilishambuliwa kwa kasi na wanakijiji hao pasipo hata kufahamu nyama hiyo kwamba ni ya punda.

Mwenyekiti wa kitongoji cha Lugolole “A” amekiri kuibiwa kwa mbwa wa mama huyo na kuuzwa shilingi 12,000 kwa makubaliano ya kuchanganya na nyama ya nguruwe na viazi ili watu wasitambue kama kuna mchanganyiko huo ili waweze kugawana fedha zitakazopatikana baada ya mauzo.

Bi Anjelina Kanyika amewataja vijana wawili waliohusika na wizi huo wa mbwa wake ambaye alikuwa na mimba, kuwa ni Ngojea Ng’alla na mwenzake Manati Dunda walimchinja mbwa ambapo watoto waliokuwa tumboni wakiwatupwa.

Bi Kanyika amesema kuwa baada ya kufanya upelelezi juu wa mbwa wake aligundua watu hao ndio walioiba mbwa wake na amesikitishwa kwa kitendo cha mbwa wake kuibiwa na kuuliwa kinyama kwa kupigwa na marungu hadi kufa ndipo alipochunwa tayari kwa kuuzwa.

Hata hivyo mtuhumiwa wa wizi wa mbwa na kuchinja nyama zisizo halali amekiri kufanya hivyo kijijini hapo takribani miaka mitano hivi sasa.

Kwa upande wake mwenyekiti wa kijiji cha Ilandutwa Bw Isack Nganingo amekiri kuchinjwa kwa nyama hizo kijijini hapo huku akikiri kuibiwa na kuchinjwa kwa mbwa wa Anjelina Kanyika hatimaye kuuzwa katika kijiji hicho.

Hata hivyo mwenyekiti huyo ametoa rai kwa wananchi wanaotaka kuchinja mnyama wa aina yeyote kijijini hapo kufika ofisini kwake ili kupewa kibali cha kuchinja mnyama huyo.